Dende a Deputación da Coruña traballamos por unha provincia con plena liberdade de ser e sentir, transinclusiva e libre de medos. Como institución pública, temos o deber de garantir que os 93 municipios coruñeses sexan espazos de liberdade, respecto e seguridade para todas as persoas.

Este compromiso é especialmente importante no medio rural e nas vilas medianas, onde a visibilización e a igualdade precisan dun apoio institucional decidido para fortalecer redes de afecto, convivencia e inclusión real.

Por este motivo, poñemos á vosa disposición unha proposta de manifesto para a súa lectura nos actos conmemorativos do 28 de xuño organizados por concellos e entidades. O texto é aberto e adaptable, polo que podedes personalizalo incorporando referencias á vosa realidade local e ao voso territorio.

DESCARGA AQUÍ O MANIFESTO

En Galiza, os principios de liberdade e igualdade aparecen recollidos no Estatuto de autonomía, no seu artigo 4.2 recolle a obriga que corresponde aos poderes públicos de «promover as condicións para que a liberdade e a igualdade das persoas e dos grupos en que se integran sexan reais e efectivas, remover os atrancos que impidan ou dificulten a súa plenitude e facilitar a participación da cidadanía galega na vida política, económica, cultural e social».

A lexislación internacional sobre dereitos humanos e múltiples tratados internacionais consagran a igualdade como un principio xurídico fundamental e universal. Desde a Declaración Universal dos Dereitos Humanos, que establece que «toda persoa ten os dereitos e as liberdades proclamados nesta declaración, sen ningunha distinción de raza, cor, sexo, idioma, relixión, opinión política ou de calquera outra índole, orixe nacional ou social, posición económica, nacemento ou calquera outra condición», numerosos textos sobre dereitos humanos e múltiples tratados consideran a igualdade das persoas como un principio xurídico fundamental e universal.